कात्तिक ०२ , जनकपुरधाम। समाजसेवाको निरन्तर यात्रामा लागिरहेको मडै समाज सेवा संस्था नेपालले आफ्नो कार्यालय उद्घाटन गर्दै नयाँ चरणमा प्रवेश गरेको छ। कात्तिक १ गते सम्पन्न उक्त समारोहले संस्थाको सामाजिक प्रतिबद्धतालाई झनै सुदृढ बनाएको छ।

उद्घाटन समारोहमा उपस्थित प्रमुख अतिथि सम्भु कुमार दास तथा समाजका अग्रज व्यक्तिहरूबीच संस्थाको केन्द्रीय अध्यक्ष रमन कुमार ठाकुरले संस्थाको सुरुवातदेखि नै गरिब, विपन्न र पीडित समुदायको सेवा गर्ने उदेश्य रहेको बताए। उनले भने, “हामीले सहयोगलाई केवल नगद वा वस्तुमा होइन, मानवता र सहानुभूतिको रूपमा बुझ्नुपर्छ।”

उक्त अवसरमा संस्थाले रामजी साहकी श्रीमती रन्जु देवी साहलाई आर्थिक सहयोगस्वरूप नगद रु. २१,०००/- प्रदान गरेको थियो। यो सहयोगले केवल आर्थिक राहत मात्र होइन, संस्थाको मानवता-केन्द्रित सोचको प्रतीक पनि बनेको थियो।

२०८१ सालदेखि निरन्तर सक्रिय रहेको मडै समाज सेवा संस्थाले राहत वितरण, रक्तदान, असहायको उपचार सहयोग र शिक्षामा सहयोगजस्ता कार्यक्रमहरू सञ्चालन गर्दै आएको छ।

कार्यक्रममा विभिन्न समाजसेवी, स्थानीय बासिन्दा र संस्थाका पदाधिकारीहरूको उपस्थिति उल्लेखनीय थियो। उद्घाटन कार्यक्रममा संस्थाका अध्यक्ष रमन कुमार ठाकुरसहित पदाधिकारीहरूले संयुक्त रूपमा संस्थाको भविष्यका योजना र सेवा कार्यक्रमहरूबारे जानकारी गराएका थिए।