|
६ कात्तिक जनकपुरधाम । धनुषामा मंगलबार बिहान करिब १० बजे धनौजी गाउँपालिका-२, गोरदाहास्थित जनज्योति स्कूलको बा ३ प ९०६५ नम्बरको बसले रामजानकी स्कूलमा अध्ययनरत आरोही कुमारी मण्डललाई ठक्कर दिएको थियो।
ठक्करबाट गम्भीर घाइते भएकी आरोहीलाई उपचारका लागि प्रादेशिक अस्पताल, जनकपुरधाम पुर्याइएको थियो, तर उपचारको क्रममा करिब ११ बजे उनको मृत्यु भएको धनुषा जिल्ला प्रहरी कार्यालयका प्रवक्ता, प्रहरी नायव उपरीक्षक बरुणबहादुर सिंहले जानकारी दिएका छन्।
घटनापछि आक्रोशित स्थानीय बासिन्दाले बसमा आगजनी गरेका छन्, जसका कारण बस पूर्ण रूपमा जलेर नष्ट भएको छ, प्रवक्ता सिंहले थपे।
सिंहका अनुसार, घटनास्थलको स्थिति अहिले सामान्य रहेको छ भने बसका चालक फरार छन्, जसको खोजीका लागि प्रहरीले अभियान चलाइरहेको छ। यस घटनाबारे थप अनुसन्धान भइरहेको प्रहरीले जनाएको छ।
